Лица без легален престој во БиХ во ризик да станат жртви на трговија со луѓе

Невладина организација Faros од Босна и Херцеговина предупредува на висок ризик од трговија со луѓе кај лицата без легализиран престој во Босна и Херцеговина, особено припадниците на ромската популација. Најмногу се загрозени младите жени и мајки со повеќе деца, се истакнува по повод Европскиот ден на борба против трговија со луѓе.

Како што се наведува, многу државјани на соседните земји како Србија, Северна Македонија, Црна Гора и Хрватска, кои основале семејства во БиХ, се соочуваат со проблеми поради недостаток на престој. Таквите луѓе често се мета на експлоататорски криминални групи.

Ингрид Халбритер од Здружението Faros напоменува дека лицата без дозвола за престој немаат пристап до основните социјални услуги, здравственото осигурување или легални работни места, што дополнително ги изложува на ризици.

Странците кои немаат дозволен престој во БиХ не можат да основат легален работен однос, немаат здравствено осигурување и поради тоа имаат ограничен или никаков пристап до здравствениот систем и немаат право на социјални услуги. Посебно е проблематична ситуацијата на оние кои немаат лични документи и не можат да ги обезбедат без поддршка од земјата на потекло. Децата на тие жени не можат да се запишат во матичните книги. Де факто се апатриди – рече Халбритер.

Здружението веќе со години помага на странците во регулирањето на престојот, вклучувајќи помош во добивањето на документите од земјата на потекло. Исто така истакнуваат дека е потребна поголема поддршка на овие лица, не само како прекршители на законот, туку и како потенцијални жртви на трговија со луѓе.

Секоја година на 18. октомври се одбележува Европскиот ден на борба против трговија со луѓе кој е основан од Европската комисија, со цел да се обрне внимание на јавноста за важноста на искоренувањето на трговија со луѓе (trafficking). Овој ден се одбележува од 2006 година за да се нагласи опасноста од трговија со луѓе.
(18.10.)