go to the original language article
Shkupi – Prokurori publik i Maqedonisë së Veriut Ljupço Kocevski sot u takua me shefin e Delegacionit të BE-së në Shkup, euroambasadorin Mihalis Rokas. Në takim, siç kumtoi Prokuroria Publike, Kocevski informoi për hapat aktiv të ndërmarrë për përmirësime në të gjitha fushat që janë të renditura si rekomandime në Raportin e fundit të Komisionit Evropian për përparimin e vendit tonë dhe për Agjendën e Reformave që së shpejti pritet të fillojë të realizohet.
Si sfidë kryesore që e ka përmendur Kocevski, e që edhe Komisioni Evropian e konstaton në raport, janë burimet e pamjaftueshme që i mundësohen institucionit për të gjitha aktivitetet që i realizon.
– Nga ne kërkohej që në projekcionet e buxhetit për vitin 2025 të shprehim nevojat dhe implikimet financiare për të gjitha këto reforma. Këtë edhe e bëmë. Por, për reformat që si shtet i kemi premtuar, e që kanë të bëjnë me punën e Prokurorisë Publike, nuk parashikohen pothuajse asnjë mjet shtesë në propozim-buxhetin për vitin e ardhshëm. Përsëri dhe këtë vit, në vend të shumës ligjërisht të përcaktuar për Prokurorinë në lartësi prej 0.4 për qind të buxhetit total të shtetit, na caktohen rreth 14 milionë euro ose diçka më shumë se 0.2 për qind, që është gjysma e minimumit ligjor, informoi Kocevski.
Ai e njohu euroambasadorin Rokas edhe me sfidat nga aspekti i pamjaftueshmërisë së stafit në prokurori, respektivisht mungesës së prokurorëve publikë dhe nëpunësve, si dhe për vjetërsinë e pajisjeve. (21 nëntor 2024)