COSV Albania në bashkëpunim me Agjencinë e Administrimit të Pasurive të Sekuestruara dhe të Konfiskuara dhe me mbështetjen e Delegacionit të BE në Shqipëri, organizuan aktivitetin e parë të projektit “Toka Jonë”, pranë Njësisë Administrative nr .14 në Tiranë, që synon rijetësimin e tokave bujqësore të konfiskuara.
“Toka Jonë” është një projekt i financuar nga Bashkimi Evropian me qëllim mbështetjen e sipërmarrjes sociale përmes ripërdorimit të tokave të konfiskuara dhe promovimit të bujqësisë sociale në bashkinë Tiranë dhe Durrës.
Projekti zbatohet nga COSV si partner udhëheqës, në partneritet me institucionet shtetërore shqiptare, veçanërisht me Ministrinë e Brendshme, përmes Agjencisë së Administrimit të Pasurive të Sekuestruara dhe të Konfiskuara (AAPSK).
Ndonëse në vitet e fundit ka filluar ripërdorimi i pronave të konfiskuara, është hera e parë që në Shqipëri punohet me tokat bujqësore për t’i shndërruar ato në sipërmarrje sociale.
Razvan Ghitescu, menaxher i Programit të Bujqësisë dhe Zhvillimit Rural, pranë Delegacionit të Bashkimit Evropian në Shqipëri, vlerësoi rëndësinë e projektit si një mënyrë për të rritur përfshirjen e të rinjve të komunitetit dhe ekspozimit të tyre ndaj mundësive të reja socio-ekonomike.
Me tej, Ghitescu solli në vëmendje vlerën simbolike që ky projekt përfaqëson.
“Ky është një projekt shumë simbolik. Ai përfaqëson një fillim dhe – nëse është i suksesshëm – një model për t’u ndjekur në të gjithë vendin! Një tokë e keqe përfundimisht bën që një pemë të vdesë. Po kështu, krimi i organizuar rrënon shoqërinë, shtyp dhe krijon varfëri për shumicën. Një pemë mund të japë fruta vetëm nëse i ka rrënjët në tokë të mirë. Për shoqërinë tonë, ajo tokë e mirë përbëhet nga edukimi i mirë dhe vlerat morale të rrënjosura te fëmijët tanë. Një kopshtar kujdeset për pemët e tij dhe nuk i lë barërat e këqija të ngatërrohen dhe ta mbysin. Kopshtari i shoqërisë është sistemi i drejtësisë dhe shteti ligjor”, tha ai.
“Bashkimi Evropian qëndron krah popullit shqiptar në dërgimin e një mesazhi të fortë se krimi i organizuar nuk do të tolerohet dhe aktivitetet e paligjshme nuk do të jenë fitimprurëse për ata që janë të përfshirë në të”, u shpreh ai.
Ghitescu e mbylli fjalën e tij duke shprehur besimin në rolin që ka shoqëria dhe shteti ynë në krijimin e modeleve pozitive.
“Ne kemi besim te populli shqiptar, duke filluar nga banorët në Yzberish, në shoqërinë civile dhe në qeverinë e këtij vendi që të vazhdojnë t’u mësojnë fëmijëve se ndershmëria dhe puna e palodhur vlen të respektohet. Se njerëzit e ndershëm nuk mund të tremben nga keqbërësit. Se shteti do të mbrojë gjithmonë të pafajshmit dhe do të ndjekë penalisht ata që shkelin ligjin”, theksoi ai.
Projekti “Toka Jonë” synon të adresojë prioritetet kombëtare për ripërdorimin social të aseteve të konfiskuara si një zgjidhje efektive për fuqizimin e organizatave jofitimprurëse kombinuar me forcimin e agjencive relevante shqiptare dhe njësive të qeverisjes vendore.
Vlera totale e projektit është afërsisht 400 000 euro, nga të cilat, BE-ja bashkëfinancon 380 000 euro./ (26 korrik)
ATA është përgjegjëse për redaktimin e këtij publikimi.