go to the original language article
Shefja e re e diplomacisë evropiane Kaja Kallas dhe presidenti i ri i Këshillit Evropian Antonio Costa arriti sot në Kiev për një vizitë simbolike mbështetje për Ukrainën në ditën e parë të mandatit të tyre.
Kjo vizitë vjen në një kohë kur tensionet mes Moskës dhe Perëndimit janë të ashpra, pas përdorimit nga Ukraina të raketave të prodhuara nga Amerika dhe Britania për të goditur thellë brenda territorit rus dhe lëshimit nga Rusia të një rakete të re supersonike kundër një qyteti ukrainas.
Komisioni i ri Evropian dëshiron të tregojë mbështetjen e fortë për Ukrainën në një kohë kur forcat ukrainase po tërhiqen nga fronti dhe bota po përgatitet për një mandat të ri të Donald Trump si president i SHBA-së, çka ngjall shqetësim për ndërprerjen e mundshme të ndihmës amerikane për Kiev.
«Kemi ardhur për të dërguar një mesazh të qartë: jemi në krah të Ukrainës dhe vazhdojmë ta mbështesim atë», deklaroi Costa para gazetarëve që e shoqëronin.
«Që nga dita e parë e luftës BE ishte në krah të Ukrainës», shkroi Costa në X bashkë me një fotografi të tij, Kallas dhe komisioneres evropiane për Zgjerimin Marta Kos duke mbërritur me tren në Kiev.
«Që nga dita e parë e detyrës sonë po rikonfirmojmë mbështetjen tonë të palëkundur për popullin ukrainas», shtoi ai.
«Në ditën e parë të detyrës time, mesazhi im është i qartë: BE dëshiron që Ukraina të fitojë këtë luftë», theksoi Kallas në X. «Do të bëjmë çfarë është e nevojshme për këtë».
Veç vështirësive në front, Ukraina është bërë objekt i bombardimeve të ashpra ajrore kundër infrastrukturës së saj energjetike javët e fundit, të cilat kanë shkaktuar ndërprerje të gjera të energjisë elektrike ndërsa afron dimri.
«Situata në Ukrainë është shumë e rëndë, por është e qartë që ka kosto të lartë edhe për Rusinë», vlerësoi Kallas, ish-kryeministre e Estonisë dhe mbështetëse e njohur për një qëndrim të ashpër ndaj Moskës.
Kallas dhe Costa, që mbajnë dy postet më të rëndësishme në BE pas shefes së Komisionit Evropian Ursula von der Leyen, pritet të kenë bisedime me presidentin ukrainas Volodymyr Zelensky.
Zelensky, i cili për më shumë se dy vjet kishte refuzuar kategorikisht të negocionte me Rusinë, duket se ka zbutur qëndrimin e tij kohët e fundit.
Të premten kërkoi nga NATO të ofrojë mbrojtje për rajonet e Ukrainës që kontrollohen nga Kieva, në mënyrë që «të përfundojë faza e nxehtë e luftës» dhe la të kuptohet se Kievi nuk do të kërkojë menjëherë të rimarrë rajonet e kapura nga Rusia.
«Nëse flasim për një armëpushim, (na nevojiten) garanci që (presidenti rus Vladimir) Putin nuk do të kthehet», theksoi Zelensky duke folur për rrjetin televiziv britanik Sky News.
Nga ana e tij, Putin kërkon që Ukraina t’i dorëzojë katër provinca, në pjesën jugore dhe lindore të vendit, të cilat janë pjesërisht nën kontrollin e trupave ruse, përveç Krimesë që Moska aneksoi në 2014. Po ashtu është kundër anëtarësimit të Ukrainës në NATO.
Sa për Kallas, ajo nënvizoi se «garancia më e fortë e sigurisë është anëtarësimi (i Ukrainës) në NATO».
«Nëse Ukraina vendos të tërheqë një vijë diku, si do të mund të garantojmë paqen në mënyrë që Putin të mos shkojë më tej?», pyeti ajo.
Diplomatët në NATO vlerësojnë se nuk ka shumë gjasa që Aleanca të ofrojë një status vend anëtari Ukrainës në të ardhmen e afërt, duke pasur parasysh kundërshtimin e një numri të madh vendesh që shqetësohen se në këtë mënyrë do të tërhiqen në një luftë të drejtpërdrejtë me Rusinë.
Sipas Kallas, BE duhet «të mos përjashtojë asgjë» për sa i përket dërgimit të trupave evropiane në territorin ukrainas për të garantuar respektimin e një armëpushimi të mundshëm që do të arrihet, edhe një masë që mund të sjellë përplasje të drejtpërdrejta me Rusinë. «Duhet të mbajmë një paqartësi strategjike për këtë çështje», theksoi Kallas.
Që kur filloi pushtimi rus në vitin 2022, Evropa ka shpenzuar gjithsej rreth 125 miliardë dollarë për të mbështetur Ukrainën, kurse SHBA më shumë se 90 miliardë dollarë, sipas një raporti të Institutit Kiel.
Por, e ardhmja e mbështetjes amerikane është në dyshim pasi Trump e ka kritikuar dhe la të kuptohet se dëshiron të përfundojë konfliktin sa më shpejt të jetë e mundur.
Kallas siguroi se BE do të përpiqet të bindë Republikanin që mbështetja për Kiev është në dobi të SHBA-së.
«Ndihma për Ukrainën nuk është bamirësi. Një fitore e Rusisë do të ashpërsonte pa diskutim Kinën, Iranin dhe Korenë e Veriut», vlerësoi ajo.
Sipas saj, BE do të vazhdojë të kërkojë të vendoset Kievi në një pozicion të fortë në rast të negociatave me Rusinë. Megjithatë, ajo pranoi se po bëhet «gjithnjë e më e vështirë» për 27 vendet anëtare të bien dakord për mjetet e reja për të forcuar mbështetjen e tyre ndaj Ukrainës.
«Kjo luftë zgjat prej disa kohësh dhe po bëhet gjithnjë e më e vështirë për t’ia shpjeguar qytetarëve tanë», vuri në dukje, përpara se të shtonte: «por nuk shoh ndonjë zgjidhje tjetër». (01/12/2024)
EM