Bullgaria renditet e treta në BE për kapacitetin e ri të instaluar për ruajtjen e energjisë me bateri, sipas një raporti të Shoqatës Evropiane të Diellit

BRUKSEL – Bullgaria renditet në vendin e tretë në Bashkimin Evropian për kapacitetin e ri të instaluar për ruajtjen e energjisë me bateri në vitin 2025. Me një pjesë tregu prej 9 për qind, vendi renditet pas Gjermanisë dhe Italisë, tregojnë të dhënat nga raporti vjetor për tregun e ruajtjes së energjisë në BE, i publikuar nga Shoqata Evropiane e Diellit (SolarPower Europe), njoftoi Shoqata për prodhimin, ruajtjen dhe tregtimin e energjisë elektrike.

Nga rreth 200 MWh kapacitet i instaluar në vitin 2024, Bullgaria arriti gati 2500 MWh deri në fund të vitit 2025. Pritshmëritë janë që që gjatë këtij viti kapaciteti të rritet katër deri në pesë herë, ndërsa aktualisht në vend po ndërtohen mbi 10 000 MWh bateri, të financuara nga Plani Kombëtar për Rimëkëmbje dhe Qëndrueshmëri.

Zhvillimi në Bullgari po ndodh në sfondin e një viti rekord për BE-në, në të cilin janë instaluar mbi 27 gigavat orë bateri të reja, ose 45 për qind më shumë krahasuar me vitin e kaluar. .

Në vitin 2025 në Bullgari filloi punën giga-fabrika e parë në Evropë për sistemet me bateri, e cila mori status strategjik sipas rregullores evropiane për industritë me emetime zero. Kjo e vendos vendin ndër pak shtetet në BE që njëkohësisht zbatojnë dhe prodhojnë teknologji kyçe për tranzicionin energjetik, theksojnë nga Shoqata për prodhimin, ruajtjen dhe tregtimin e energjisë elektrike.

Për shtete si Bullgaria, tranzicioni energjetik është para së gjithash një temë ekonomike, e jo një objektiv abstrakt klimatik. Kjo e bën industrinë më konkurruese, tërheq investime dhe mban vendet e punës, deklaroi Nikola Gazdov, kryetar i shoqatës.

Energjia diellore tashmë është një faktor kyç në përzierjen energjetike të vendit. Në muajt e ngrohtë, midis marsit dhe shtatorit, ajo siguron deri në dhe mbi 70 për qind të konsumit të energjisë elektrike gjatë orëve me dritë. (30.01.2026)