Kryetarja e opozitës në Venezuelë, Machado, dhe kandidati i saj për president, Urrutia, u nderuan me çmimin Saharov

Me çmimin Saharov, nderimi më i lartë i Bashkimit Evropian për të drejtat e Njeriut, u nderuan Maria Korina Matsado dhe Edmundo Gonzalez Urutia, liderja e opozitës në Venezuelë dhe kandidati i saj në zgjedhjet presidenciale të korrikut.
“Edmundo dhe Maria vazhduan të luftojnë për një kalim të pushtetit të lirë, të drejtë dhe paqësor dhe mbrojtën pa frikë vlerat që janë kaq të dashura për miliona Venezuelianë dhe këtë Parlament: drejtësinë, demokracinë dhe shtetin e së drejtës”, tha presidentja e Parlamentit Evropian Roberta Metsola.
“Parlamenti qëndron në krah të popullit të Venezuelës dhe të Marisë dhe Edmundos në luftën e tyre për të ardhmen demokratike të vendit të tyre”, shtoi ajo. “Ne jemi të bindur se Venezuela dhe demokracia do të triumfojnë në fund”.
Pas rizgjedhjes së kontestuar të presidentit Nikolas Maduro, 75-vjeçari Edmundo Gonzalez Urutia kërkoi strehim në Spanjë dhe 56-vjeçarja Maria Korina Matsado jeton në ilegalitet.
Dy opozitarët ishin propozuar nga Partia Popullore Evropiane (e djathta, fuqia e parë politike në Parlamentin Evropian).
Delegacioni francez i grupit Socialistët dhe Demokratët, i cili kishte propozuar dhënien e çmimit organizatës izraelite “Gratë për Paqe” dhe organizatës palestineze “Gratë e Diellit” që punojnë së bashku për paqen në Lindjen e Mesme, foli për “një mundësi të humbur për të promovuar paqen dhe pajtimin” në Lindjen e Mesme.
Finalisti i tretë këtë vit ishte Gubad Ibadoglu, një ekonomist dhe aktivist i burgosur në Azerbajxhan.
E djathta ekstreme evropiane, ku bëjnë pjesë grupi Patriotët nën drejtimin e Zhorndan Bardela të partisë franceze Mbledhja Kombëtare e Marin Le Pen, kishte propozuar, pa sukses, dhënien e çmimit miliarderit Elon Musk për kontributin e tij në “lirinë e shprehjes”.
Çmimi Saharov jepet çdo vit për persona dhe organizata që mbrojnë të drejtat e Njeriut dhe liritë themelore. Çmimi, i cili shoqërohet me një shpërblim monetar prej 50,000 euro, mban emrin e disidentit sovjetik dhe fizikanit bërthamor Andrei Saharov, i cili u nderua me çmimin Nobel për Paqen në vitin 1975.