go to the original language article
Shkup – Për shkak të futjes së sistemit të ri për hyrje dhe dalje (EES) të Bashkimit Evropian, transportuesit maqedonas, si dhe ata nga Kosova, Serbia, Mali i Zi dhe Bosnja e Hercegovina, njoftuan se të hënën do të fillojnë një bllokadë shtatëditore të pikave kufitare që shkojnë drejt zonës Shengen.
Biljana Muratovska, sekretare e përgjithshme e Asociacionit të shoqatave të punëdhënësve të shoqërive tregtare transportuese „Makam-trans“, deklaroi për MIA se janë të vetëdijshëm për pasojat e bllokadës, por thekson se nëse realizohen kërkesat e tyre, përfitimet do të jenë të mëdha në raport me rritjen dhe zhvillimin e ekonomisë si në shtet ashtu edhe në Ballkanin Perëndimor.
Muratovska thotë se për momentin nuk ka asnjë sinjal nga Komisioni Evropian për çfarëdo negociatash në lidhje me zgjidhjen e problemit me evidentimin e qëndrimit në zonën Shengen në përputhje me rregullin 90/180 ditë për shoferët profesionistë.
– Nëse deri të hënën nuk merret çfarëdo informacioni nga BE-ja, protesta në të gjitha katër shtetet do të fillojë saktësisht në orën 12 për të gjitha automjetet që dalin nga shteti, ndërsa për të gjitha automjetet që do të hyjnë në shtet pikat kufitare mbyllen në orën 00:00 me qëllim që të gjithë ata që kthehen në shtëpi të mund të hyjnë dhe t’i bashkohen protestës – deklaroi Muratovska.
Kërkesa kryesore e transportuesve është të gjendet një zgjidhje për qëndrimin e shoferëve në zonën Shengen, siç shpjegon Muratovska, që të mos evidentohen ditët ose të na lëshojnë një lloj vize që nuk kufizohet me numër ditësh.
– Rregullat e reja do të nënkuptojnë kolaps të plotë të ekonomisë në shtet, përkatësisht në të gjithë rajonin e Ballkanit Perëndimor, duke përfshirë edhe Turqinë (shtete që nuk janë anëtare të BE-së dhe të zonës Shengen), për shkak të ndërprerjes së zinxhirit të furnizimit. Ndërsa industria e transportit në të cilën është investuar kapital i madh dhe siguron hyrje të valutës së fortë të huaj në buxhet do të tronditet plotësisht – thekson Muratovska.
Protesta, thekson ajo, fillon më 26 janar dhe, sipas reagimit të BE-së, do të varet nëse do të fillojë ose do të zgjasë shkurt, por megjithatë kohëzgjatja maksimale e bllokadave do të jetë shtatë ditë, që është sinonim për një cikël mesatar të transportit të mallrave.
– Me këtë bllokadë jemi të vetëdijshëm se do të ketë humbje të caktuara minimale financiare për të gjithë, por megjithatë përfitimet nga kjo, nëse realizohen kërkesat tona, do të jenë të mëdha në raport me rritjen dhe zhvillimin e ekonomisë në shtet dhe në Ballkanin Perëndimor – deklaroi Muratovska. (23 janar 2026)