Pisonero: KE analizon agjendat reformuese të Serbisë dhe partnerëve të tjerë nga BP

BRUKSEL- Zëdhënësja e Komisionit Evropian për fqinjësinë dhe zgjerimin Ana Pisonero deklaroi se Komisioni Evropian aktualisht po analizon agjendat reformuese të parashikuara në Planin e rritjes për Ballkanin Perëndimor, të cilat janë paraqitur nga partnerët e Ballkanit Perëndimor, duke përfshirë Serbinë, dhe theksoi se këto agjenda reformuese duhet të përmbajnë një shpjegim mbi masat që do të kontribuojnë në harmonizimin me politikën e jashtme dhe të sigurisë të BE-së. “Komisioni aktualisht po analizon agjendat reformuese të paraqitura nga partnerët e Ballkanit Perëndimor, Serbia dhe partnerët e tjerë të Ballkanit Perëndimor”, tha Pisonero në një konferencë për shtyp në Bruksel. Ajo kujtoi se miratimi i agjendave reformuese do të bëhet përmes vendimit të Komisionit për zbatimin, dhe se Komisioni, siç theksoi ajo, do të konsultohet me shtetet anëtare para kësaj. “Vlerësimi është në proces”, theksoi Pisonero. Ajo shpjegoi se marrja e mbështetjes financiare në kuadër të këtij instrumenti do të varet nga zbatimi i suksesshëm i reformave, të cilat do të duhet të jenë të dakorduara me Komisionin, i cili do të mbulojë si reformat në fushën socio-ekonomike, ashtu edhe ato që lidhen me themelet e BE-së. Pisonero u përgjigj kështu në pyetjen e gazetarëve nëse marrëdhëniet e disa vendeve të Ballkanit Perëndimor me Rusinë do të ndikojnë në pagesat e para nga Plani i rritjes për Ballkanin Perëndimor, duke theksuar se për këtë ka disa kushte dhe parakushte. Kur flitet për harmonizimin me politikën e përbashkët të jashtme dhe të sigurisë (CFSP) të BE-së, tha ajo, kjo është përfshirë si një qëllim i veçantë në kontekstin e agjendave reformuese. “Kjo do të thotë që në agjendat reformuese vendet do të duhet të paraqesin një shpjegim se si këto masa, masat që ata synojnë të ndërmarrin në kuadër të agjendave të tyre reformuese, pritet të kontribuojnë në harmonizimin progresiv dhe të vazhdueshëm, kur bëhet fjalë për politikën e përbashkët të jashtme dhe të sigurisë të BE-së, duke përfshirë masat kufizuese”, tha Pisonero. Përsa i përket marrëdhënieve të Serbisë me Rusinë, ajo theksoi deklaratën e zëdhënësit të Komisionit Evropian Peter Stano, i cili në një konferencë për shtyp, në pyetjen për të komentuar takimin e zëvendëskryeministrit të Serbisë Aleksandar Vulin me presidentin rus Vladimir Putin, tha se BE-ja pret nga Serbia që të përmbahet nga intensifikimi i marrëdhënieve dhe kontakteve me Rusinë. Ai shtoi se BE-ja pret që të gjithë anëtarët e qeverisë serbe të respektojnë angazhimet që Serbia ka marrë vullnetarisht kur bëhet fjalë për anëtarësimin në BE, që përfshin harmonizimin me vendimet dhe veprimet e politikës së jashtme të BE-së.(5 shtator)