go to the original language article
Shkupi – Ministria e Shëndetësisë sot shënoi përfundimin e projektit dyvjeçar “Zbatimi i Strategjisë për Shëndetësi 2021-2030” i zbatuar në partneritet dhe me mbështetje financiare nga Delegacioni i Bashkimit Evropian në Shkup.
Qëllimi i Projektit, i cili filloi në shtator 2022, është të kthejë Strategjinë në masa konkrete dhe aktivitete me të cilat do të përmirësohet mbrojtja shëndetësore e qytetarëve dhe për ndërtimin e një sistemi shëndetësor më efikas, më human dhe më të arritshëm. Projekti ishte dhe mekanizëm kyç për gjetjen e zgjidhjeve konkrete dhe udhëzimeve të përshtatura me legjislacionin e Bashkimit Evropian.
– Strategjia e përcakton rrugën dhe vizionin për shëndetësinë, ndërsa projekti e bëri këtë vizion realitet përmes rekomandimeve konkrete dhe zgjidhjeve të zbatueshme. Siguruam themele për ndryshime të qëndrueshme dhe afatgjata në sistemin shëndetësor, theksoi ministri i Shëndetësisë Arben Taravari.
Përfaqësuesja nga Delegacioni i BE në Shkup, Mari-Madelin Kanelopolu, theksoi se është e rëndësishme që autoritetet kombëtare të sigurojnë staf dhe burime për të zbatuar rekomandimet që rrjedhin nga projekti.
– Është e rëndësishme të keni njerëz që do të sigurojnë zbatimin e rekomandimeve në përputhje me praktikat më të mira mjekësore. Dua të kujtoj se në Raportin e fundit të Komisionit Evropian theksohet se Maqedonia e Veriut është mesatarisht e përgatitur në fushën e mbrojtjes shëndetësore dhe është arritur një përparim i moderuar në screening e kancerit. Gjithashtu theksohet se financimi është dukshëm nën mesataren evropiane, ashtu si edhe numri i specialistëve. Pra, nevojiten shërbime mjekësore specialistike, tha Kanelopolu, duke shtuar se stafi i pamjaftueshëm është një “hendek shumë i madh për të siguruar qasje efektive në mbrojtjen shëndetësore”. (27 janar)