Slovenia dhe Gjermania për futjen e kuponëve për kulturën për të rinjtë në nivelin e BE-së

Ljubljana – Ministrja për kulturën e Sllovenisë Asta Vrečko ka pritur kolegen e saj gjermane Claudia Roth gjatë një vizite pune në Ljubljanë, ku u angazhuan për futjen e bonuseve për kulturë për të rinjtë në nivelin e BE. Sipas modelit të Gjermanisë, këto bonuse për të rinjtë do të implementohen në Slloveni në vitin 2026, tha Vrečko.

Në Gjermani, bonuset për kulturë për të rinjtë u futën në vitin 2023 dhe brenda një viti e gjysmë arritën 50 përqind të 18-vjeçarëve, shpjegoi ministrja Roth.

Masa, të cilën e krahasoi me biletën falas Interrail për të rinjtë për udhëtim me tren nëpër Evropë, është prezantuar tashmë për komisionerin e ri evropian të kulturës Glenn Micallef. Iniciativa të ngjashme tashmë ekzistojnë në Francë, Spanjë, Itali, Danimarkë dhe Qipro, shtoi ajo.

Ministrja Vrečko kujtoi se programi nacional për kulturën i Sllovenisë tashmë përfshin bonuset për kulturë, duke e shprehur shpresën se mund të implementohen vitin e ardhshëm. Ajo gjithashtu shtoi se bonuse nuk janë vetëm projekt i ministrisë së kulturës, por janë vendim i shtetit slloven, për të orientuar të rinjtë drejt kulturës, leximit, mendimit dhe zgjerimit të horizonteve të tyre.

Nëse këto bonuse do të pranoheshin në nivel evropian, do të ishte, sipas saj, një hap i madh drejt një bote më të mirë.

Ministrat vlerësuan se në fushën e kulturës, të dy vendet bashkëpunojnë mirë dhe ngushtë, ndërkohë që këtë vit, si Sllovenia ashtu edhe Gjermania, do të kenë kryeqytetin e tyre evropian të kulturës (EPK). Sipas paralajmërimeve, ministrja sllovene për kulturën do të marrë pjesë në ceremoninë e hapjes në Chemnitz, Gjermani më 18 janar, ndërsa ministrja gjermane parashikohet të marrë pjesë në ceremoninë e hapjes së EPK-së sllovene më 8 shkurt, të cilën për herë të parë si EPK ndërkufitare do ta presin Nova Gorica dhe Gorica. (3 janar)