Бугарија инсистира на вклучување на заштитни клаузули во сите договори за слободна трговија во земјоделскиот сектор

СОФИЈА – Бугарија инсистира заштитните клаузули да бидат неразделен дел од сите договори за слободна трговија во земјоделскиот сектор. На седница на Советот на Европската унија за земјоделство и рибарство во Брисел, заменик-министерот д-р Лозана Василева ја изнесе позицијата на Бугарија по документот претставен од Полска во врска со неопходните дејствија за заштита на чувствителните земјоделски сектори во контекст на трговските договори со трети земји.

Бугарскиот заменик-министер, цитирана во соопштение од Министерството за земјоделство и храна, изјави дека заштитните клаузули треба да бидат неразделен дел од сите договори за слободна трговија во земјоделскиот сектор, за да се гарантира привремено запирање на преференциите во случај на закана за производството на ЕУ, предизвикана од прекумерен увоз.

„Нашата земја повеќепати досега ја има потенцирано потребата од примена на единствени барања кон стоките од ЕУ и увезените стоки“, рече Василева. Таа ја нагласи и потребата од создавање на посебен фонд за надоместување на евентуални загуби претрпени од земјоделскиот сектор како резултат на стапувањето во сила на договорите за слободна трговија.

Заменик-министерот Василева ја изрази и позицијата на Бугарија во поддршка на документот на Австрија во врска со силниот економски притисок на кој се изложени земјоделските производители во ЕУ и кој ја загрозува нивната економска одржливост. Во документот се инсистира на преземање на низа дејствија, меѓу кои – привремено запирање на Механизмот за корекција на јаглеродните емисии на границите (CBAM) за ѓубрива, зголемена транспарентност и мониторинг на пазарот на ѓубрива, привремено запирање на тарифите за најповластени нации и специфичните антидампинг давачки врз ѓубривата во интерес на Унијата.

На седницата министрите ја дискутираа улогата на рибарството, земјоделството и шумарството во контекст на Стратегијата на ЕУ за биоекономијата. Заменик-министерот Василева истакна дека Бугарија позитивно ја оценува Стратегијата, која содржи важни елементи во поддршка на примарните производители. „Неопходно е, сепак, да се засили пристапот до финансирање, да се олесни регулаторната рамка и да се гарантира дека производителите добиваат правичен дел од создадената додадена вредност“, рече Василева и додаде дека за обезбедување реална и брза поддршка, неопходно е да се земат предвид националните специфики, конкретните потреби на поединечните земјоделски стопани и одржливите бизнис модели. Според зборовите на Василева, треба да се најде соодветен механизам кој ќе гарантира дека дадените стимулации не водат до дополнително административно оптоварување за земјите членки.

Во текот на седницата, министрите дискутираа и за регулативата претставена од Европската комисија за измена на Регулативата за органско производство. Василева изјави дека Бугарија ги поддржува предложените измени, кои имаат за цел намалување на административниот товар, зголемување на конкурентноста, ажурирање на правилата за гарантирање на заштита и предвидливост на органскиот сектор. „Јасниот распоред за усвојување на регулативата до крајот на 2026 година ќе обезбеди предвидливост за земјоделските производители, преработувачите и сертифицирачките органи, со што ќе се олеснат и нивните инвестициски одлуки“, додаде заменик-министерот. (27 јануари)