Have the article read by OpenAI (Beta). Please note that AI translations may take some time to process.Скопје – Не се точни тврдењата дека Европската Унија не ја сака Северна Македонија за своја членка, изјави евроамбасадорот Дејвид Гир, на настанот во рамки на Деновите на НАТО во земјава, по повод одбележување четири години од членството на Северна Македонија во Алијансата и 75 години од нејзиното формирање.
– Вообичаено е да се слушнат гласови на сирени кои велат дека оваа земја не може да и пристапи на Европската Унија, дали затоа што Унијата не ја сака внатре или затоа што не е способна да биде дел од Европската Унија. Ниту едно од овие тврдења не е точно. Ние сакаме Северна Македонија да биде дел од Европската унија. Патот е практичен и многу лесно остварлив, подвлече Гир.
Во тој поглед, додаде евроамбассадорот, го споделувам мислењето дека патот на Европската Унија е пат на просперитет, на зајакнување на демократските вредности и владеењето на правото и е пат на стабилност. – Но, исто така, тоа е и пат на безбедност и навистина веруваме дека членството на Северна Македонија во Европската Унија ќе биде од корист за сите нас, рече Гир.
И од овие причини, истакна евроамбасадорот, ја поттикнуваме Северна Македонија да се придвижи што е можно побрзо кон Европската Унија.
– Сакаме оваа земја да биде дел од Европската Унија врз основа на исполнувањето на обврските коишто ги презеде во јули 2022 година, по кои следуваше меѓувладината конференција и скрининг процесот, како и имплементацијата на реформите коишто беа утврдени во текот на процесот на скрининг вклучително и тие коишто се наброени во новиот план за раст и реформи на Европската Унија, рече евроамбасадорот Гир.
MIA е одговорна за уредувањето за оваа публикација.