Have the article read by OpenAI (Beta). Please note that AI translations may take some time to process.Скопје – Проширувањето на Европската Унија е геостратешка инвестиција во мирот, безбедноста и стабилноста. Северна Македонија никогаш не се откажала од патот кон европската интеграција, но се соочи со реални предизвици и пречки кои го забавија овој пат. Процесот на интеграција е проект кој бара секојдневна посветеност, политичко трпение и длабока верба во заедничките вредности, порачаа говорниците денеска на панел дискусијата „Обликување на иднината – ЕУ интеграцијата како двигател на напредокот на Северна Македонија“, што се одржува по повод одбележување на Денот на Европа – 9 Мај во Скопје.
Претседателот на Собранието, Африм Гаши во своето обраќање на панел дискусијата рече дека Европа не е само наша целна дестинација, туку и огледало во кое ја гледаме нашата иднина.
– И покрај тоа што одбележуваме симболична годишнина на ЕУ, означуваме и една четвртина век длабока соработка со нашите партнери. Ова патување ја одразува историјата на нашата посветеност, предизвици и трансформација, но пред се, ја одразува политичката и општествена реалност изградена преку дијалог и заедничка визија, рече Гаши.
Тој посочи дека на ова патување не беше лесно, но, напомена, државава покажа дека ништо не е поважно од заложбата за изградба на стабилни институции, почитување на владеење на правото и гарантирање на правата на секој граѓанин, прифаќајќи ги целосно европските вредности и стандарди.
– Мора да бидеме искрени и решителни. Северна Македонија никогаш не се откажала од патот кон европската интеграција, но се соочи со реални предизвици и пречки кои го забавија овој пат. Процесот на интеграција е проект кој бара секојдневна посветеност, политичко трпение и длабока верба во заедничките вредности, рече Гаши.
Од другата страна, како што посочи Гаши, кризите кои го зафатија регионот јасно покажуваат дека европската интеграција на земјите од Западен Балкан не се само политичко прашање за нас, туку геополитичка неопходност за цела Европа.
– Целосно сум уверен дека Северна Македонија, како што и претходно покажала, ќе ги надмине и овие предизвици, но затоа е неопходна искрена и стабилна поддршка од нашите меѓународни партнери. Заедно како институции организации и граѓани мора да продолжиме да ја градиме Северна Македонија. Како претседател на Собранието ја гарантирам мојата заложба во овој институционален дом да остане столб на демократијата и место за дијалог, а не место за поделби и арена на тесни интереси, рече Гаши.
Претседателот на Фондацијата Конрад Аденауер и 12-ти претседател на германскиот Бундестаг, Норберт Ламерт во своето обраќање на настанот посочи дека проширувањето на Европската Унија е геостратешка инвестиција во мирот, безбедноста и стабилноста.
– Од нашиот последен Самит излезе заклучокот дека процесот на проширување доби нова динамика и има постигнато значителен напредок. Според мојата перцепција, мислам дека ние сме повеќе соочени со дискретна стагнација, а не со очигледен напредок. Потенцијалните земји членки треба да исполнат одредени критериуми кои што се неопходни за пристапување во ЕУ, а и убеден сум дека иновациите во поновата историја на Европа се всушност дел од процесот на европската интеграција, рече Ламерт.
Претседателот на Центарот за европски студии Вилфрид Мартенс и поранешен премиер на Словачка Микулаш Ѕуринда, напомена оти верува дека исто како и Словачка, патот на Северна Македонија ќе биде успешен, а тоа ќе значи дека крајната цел на пристапување кон Европската Унија ќе биде исполнета.
– Ова го изјавувам со целосната свесност за сите предизвици со кои се соочувала Македонија до сега и сите предизвици кои најверојатно ќе продолжат и во иднина да бидат предизвик за земјата. Навистина сум свесен и можам да замислам колкава е фрустрацијата која што ја чувствуваат македонските лидери, кои што се надеваат на европското членство, а истовремено се свесни за сите недоследности со кои се соочува оваа земја. Сите сме свесни дека надворешните околности се сменија, почнувајќи од големото проширување во 2002 година, во кое беше и мојата земја. Овие околности, за жал, беа променети на полошо, рече Ѕуринда.
Настанот беше организиран од Фондацијата Конрад Аденауер, Европското движење во Република Северна Македонија и Вилфрид Мартенс Центарот за Европски студии. (29 мај 2025)
MIA е одговорна за уредувањето за оваа публикација.