Советот на ЕУ за општи работи не усвои заклучоци за проширувањето на Унијата

БРИСЕЛ – Советот на Европската унија за општи работи денеска, на последната седница во оваа година, не го усвои текстот на заклучоците за проширување на Унијата, соопшти данската министерка за европски прашања Mari Bjere. „Се обидовме да дојдеме до заклучоци на Советот, но за жал тоа не беше можно. Унгарија нè блокира да дојдеме до заклучоци. Нашите обиди да дојдеме до решение беа одбиени и многу ми е жал поради тоа“, рече Bjere на конференција во Советот на ЕУ.

Таа истакна дека поединечни членки на Советот укажале дека тоа испраќа погрешен сигнал до земјите кандидати за членство. „Сакаме тие да се определат за ЕУ, а не за Русија, и жалиме поради тоа. Особено ако се има предвид дека проширувањето е многу важно за сите останати земји членки, а исто така и дека земјите кандидати постигнуваат резултати во рамките на процесот на пристапување заснован на заслуги“, рече Bjere. Таа додаде дека сега Советот на ЕУ ќе го „трансформира“ нацрт-текстот на заклучоците во заклучоци на Претседателството на Советот на ЕУ, со поддршка на 26 земји членки на Унијата. Bjere наведе дека на денешната седница, покрај проширувањето, станало збор и за подготовката на состанокот на Европскиот совет, на кој клучно прашање ќе биде обезбедувањето континуирано финансирање на Украина, вклучувајќи го и предлогот на Европската комисија за кредити за репарации врз основа на имобилизиран руски имот. „Ова е во многу нешта историска и клучна недела за Европа. Апсолутен императив е за Украина и за европската безбедност да најдеме решение за Украина“, оцени Bjere.

На состанокот една од темите беше и повеќегодишната финансиска рамка, односно „постигнување основа за напредок“ во тоа поле. Таа наведе дека ЕК претставила три извештаи за принципот на поедноставување и зајакнување на конкурентноста, за што истакна дека биле клучен елемент на данското претседавање со Советот на Европската унија. Bjere изрази задоволство што била дадена поддршка на оваа агенда и истакна дека со усвојувањето на заклучоците сега постои и поддршка за систематско следење на економските последици на секои шест месеци. „Тоа ќе помогне во обликувањето на идната работа на поедноставувањето“, заклучи Bjere. (16 декември)