ЕУ издвојува 13,5 милиони евра поддршка за БиХ за самостојно управување со миграциите

Сараево, (Fena) – Европската унија издвои 13,5 милиони евра за Босна и Херцеговина за потребите за зајакнување на одговорот на прашањата за нерегуларни миграции и борбата против организираниот криминал. Оваа помош има за цел да ги зајакне капацитетите на државните власти со цел преземање водечка улога во управувањето со миграциите, усогласување на мерките со стандардите на ЕУ, зајакнување на општествената поврзаност, а ќе се спроведува во партнерство со Меѓународната организација за миграции (IOM), УНХЦР и УНИЦЕФ.

– Денес е Меѓународен ден на мигрантите, а оваа иницијатива претставува важен чекор во насока на зајакнување на одговорот на Босна и Херцеговина на миграциите, со сопствени сили и со почитување на правата. Со зајакнување на институционалните капацитети, властите ќе можат подобро да ги координираат и управуваат миграциските текови, да ги штитат интересите на заедниците и да обезбедат придонес кон стабилноста на општеството. Оваа поддршка исто така ѝ помага на Босна и Херцеговина да биде усогласена со европските стандарди во областа на управувањето со миграциите, што е од клучно значење на патот кон приклучување кон ЕУ – изјави шефот на Делегацијата на ЕУ во Босна и Херцеговина Luigi Soreca.

Клучните државни актери, вклучувајќи го Министерството за безбедност, Министерството за човекови права и бегалци, Министерството за цивилни работи и Службата за работи со странци, ќе добијат целна поддршка за преземање на целосна одговорност во областа на управувањето со миграциите.

Стратешките вложувања ќе го зајакнат управувањето и надзорот над привремено-прифатните центри, ќе ги усогласат практиките за управување со границата со стандардите на ЕУ и ќе обезбедат помошта и процесот на регистрација да ги почитуваат човековите права и потребната заштита.

Финансиската поддршка од ЕУ исто така ќе ги зајакне капацитетите на институциите на БиХ за потребите на координација и обезбедување на клучни хуманитарни услуги на територијата на целата држава, како што се обезбедување храна, непрехранбени производи, вода, санитарни и хигиенски потреби, како и здравствена заштита за мигрантите.

Поддршката се проширува за да ги опфати и органите на јавното здравство на ниво на кантони, со што се обезбедува луѓето во движење да имаат пристап до навремена и соодветна здравствена нега.

Иницијативата исто така ги поддржува локалните заедници и организациите на граѓанското општество, со што се зајакнува општествената поврзаност. Грантовите и техничката помош ќе помогнат да се зајакне соработката и довербата на локално ниво, и повикуваат на градење позитивни односи помеѓу заедниците домаќини и мигрантите.

– Конечно, проектот финансиран од ЕУ „Индивидуални мерки за зајакнување на системот за управување со нерегуларните миграции и борба против организираниот криминал“ има за цел да ѝ овозможи на Босна и Херцеговина во целост да биде сопственик на системот за управување со миграциите, додека во исто време ја промовира стабилноста, заштитата и интеграцијата, сè во согласност со вредностите на ЕУ и меѓународните стандарди – изјавија тие.

ЕУ до денес поддржа сместување и егзистенцијална помош за повеќе од 200.000 мигранти, баратели на азил и бегалци во БиХ, со што ја покажува трајната определба на ЕУ кон партнерството и стабилноста. (18.12.)