Парламентот го ратификува Договорот за придонес меѓу Бугарија и ЕИБ во врска со Фондот „ЕУ за Украина“

СОФИЈА – Бугарскиот парламент го усвои во прво и второ читање на едно заседание Предлог-законот за ратификација на Договорот за придонес меѓу Република Бугарија и Европската инвестициска банка (ЕИБ) во однос на Фондот „ЕУ за Украина“.

Конечно, во второ читање спогодбата ја поддржаа 108 пратеници, а 57 беа „против“. Немаше воздржани.

Учеството на Бугарија во Фондот „ЕУ за Украина“ со придонес во форма на гаранција во износ од 10 милиони евра е одобрено од Владата на 11 октомври 2023 г., е наведено во извештајот на буџетската комисија. Издавањето на државната гаранција во врска со учеството на Бугарија во Фондот преку склучување на двата договори со ЕИБ е предвидено во чл. 73, т. 2 од Законот за државниот буџет на Република Бугарија за 2025 г.

Фондот е дел од иницијативата на ЕИБ „ЕУ за Украина“ и има за цел да им овозможи на државите членки на Европската унија, Европската комисија и други земји и донатори да го поддржат преку својот придонес обновувањето на Украина. Придонесот е доброволен и може да биде во форма на паричен влог, гаранција или комбинација од двете.

Средствата се користат за гарантирање на операциите на ЕИБ со сопствени ресурси во Украина, како и за обезбедување на инвестициски грантови и каматни субвенции, пишува во извештајот на буџетската комисија. Во рамките на Фондот се финансираат и проекти во јавниот и во приватниот сектор со основен фокус врз општинската инфраструктура.

Придонесот на донаторите се уредува со Договор за придонес, склучен меѓу соодветната држава и ЕИБ. Во него се определуваат износот, видот (паричен влог или гаранција), дозволените операции и др. Во врска со влоговите во форма на гаранција заедно со Договорите за придонес се склучува и Гаранциски договор. При активирање на гаранцијата, сите загуби од операциите на ЕИБ се покриваат колективно од сите учеснички држави гаранти, пропорционално на нивниот удел во Фондот.

Досега договори за придонес се потпишани од 16 држави од ЕУ – Белгија, Италија, Кипар, Данска, Естонија, Франција, Латвија, Литванија, Луксембург, Нидерланд, Финска, Хрватска, Шпанија, Полска, Словачка и Ирска, при што четири од нив имаат потпишано гаранциски договори. Вкупниот износ на учеството на сите е 410,3 милиони евра.

На крајот на минатата недела лидерите на ЕУ постигнаа договор за одобрување на бескаматен заем за Украина во износ од 90 милијарди евра, наместо да се користат замрзнатите руски средства.

“Денес одобривме одлука да ѝ обезбедиме 90 милијарди евра на Украина”, изјави претседателот на Европскиот совет Антонио Кошта на прес-конференција по повеќечасовните преговори меѓу европските лидери во Брисел. “Како итно прашање ќе обезбедиме заем, гарантиран од буџетот на ЕУ”, истакна Кошта.

Заемот за Украина ќе биде подигнат само од државите во ЕУ кои сакаат да се вклучат, прецизира претседателката на Европската комисија Урсула фон дер Лајен на прес-конференција по крајот на последното за годинава заседание на европските лидери во Брисел. Таа посочи дека заемот од 90 милијарди евра ќе биде земен од меѓународните пазари по постапката на ЕУ за т.н. засилена соработка, при која учествуваат државите што изразиле желба, со можност останатите да се приклучат ако и кога посакаат. Нашата јасна цел е постигнување праведен и траен мир во Украина, рече Фон дер Лајен. (19 декември)