Бугарија ќе учествува како земја домаќин во Финансискиот механизам за обновлива енергија

СОФИЈА – Бугарија ќе учествува како земја-домаќин во Финансискиот механизам за обновлива енергија, одлучи бугарската техничка влада во врска со поканата до земјата од Генерална дирекција „Енергетика“ на Европската комисија за поднесување обврзувачки интерес за 2026 година.

ЕК планира да објави постапка по Финансискиот механизам, преку која ќе биде обезбедена инвестициска поддршка за проекти што ќе се реализираат на територијата на Бугарија и Финска како земји-домаќини. Финансискиот ресурс се обезбедува од Луксембург, а вкупниот буџет на постапката е 55 милиони евра.

Ќе се финансираат проекти за копнени фотоволтаични централи со батериски системи за складирање во Бугарија и такви за копнени фотоволтаични системи во Финска.

Во Бугарија проектите ќе бидат во трите јагленски региони – Перник, Кјустендил и Стара Загора, при што постројките треба да функционираат најмалку 15 години по нивното пуштање во употреба.

Управувањето со постапката – објавувањето на поканата, прибирањето, оценувањето на проектните предлози и мониторингот на нивната реализација ќе го врши Европската извршна агенција за клима, животна средина и инфраструктура. За финансирање можат да аплицираат јавни или приватни правни лица од која било држава во светот.

Учеството на Бугарија во Финансискиот механизам како земја-домаќин ќе обезбеди инвестициска поддршка за комбинирани проекти за изградба на фотоволтаични централи со системи за складирање енергија, што ќе овозможи зголемување на инсталираните капацитети што користат сончева енергија и зголемување на потрошувачката на еколошки чиста енергија во земјата. Територијалното распоредување на проектите во трите јагленски региони на земјата ќе ги надополни финансиските инструменти што се применуваат согласно територијалните планови за праведен преод и ќе помогне во енергетскиот преод на овие региони, се наведува во соопштението на владината прес-служба. (14.01.2026)