Interpol соопшти за 85 апсења во операција во 17 земји

Брисел – Меѓународна операција низ Латинска Америка, Карибите и Европа резултираше со апсење на 85 лица барани од Интерпол и лоцирање на уште 18, соопшти меѓународната полициска организација од своето седиште во францускиот град Лион.

Истражители од 17 земји учествуваа во шестмесечна кампања од јуни до ноември за размена на разузнавачки информации и таргетирање на 184 случаи со висок приоритет, соопшти Меѓународната организација на криминалистичката полиција.

Операцијата ги таргетираше „најопасните бегалци барани за насилни злосторства или врски со транснационален организиран криминал“, се наведува.

Меѓу уапсените, 19 биле барани за убиство, 29 за трговија со дрога, 28 за злосторства против деца и седум за силување. Други биле приведени за трговија со луѓе, перење пари и други прекршоци поврзани со криминални синдикати.

Се очекуваат дополнителни апсења, се наведува.

Детализирајќи ги апсењата, Интерпол соопшти дека Lissette Ysabel Rojas Guevara, една од најбараните осомничени во Чиле, за која се смета дека е поврзана со организираната криминална група Tren de Aragua, била уапсена во Шпанија во врска со шема за измама со криптовалути вредна 150 милиони долари. Шемата била користена за перење приходи од трговија со дрога и изнуда низ Чиле, Колумбија, Венецуела и Иберискиот Полуостров.

Во Португалија, властите го уапсиле бразилскиот државјанин Daniel Zago, наводно поврзан со организираната криминална група Primeiro Comando da Capital, позната како PCC, со што бил нарушен клучен коридор за трговија со кокаин од Сао Паоло до Европа.

Албанскиот државјанин Dritan Gjika бил уапсен во Обединетите Арапски Емирати поради наводни пратки кокаин од Еквадор сокриени како извоз на банани, а во Еквадор литванскиот бегалец LG бил приведен во врска со трговија со дрога.

Операцијата беше спроведена во рамки на проект финансиран од ЕУ, кој има за цел воспоставување постојана меѓународна мрежа на истражители за бегалци. (29 декември)