Во година кога светот одбележува 80 години од победата над фашизмот и 75 години од Шумановата декларација, темелот на европскиот мировен проект, ние остануваме цврсто посветени на нашата стратешка цел – полноправно членство во ЕУ со јасна и предвидлива динамика, нагласи Муцунски.
Од страна на министерот Муцунски уште еднаш беше повторена неопходноста билатералните прашања да не претставуваат пречка за напредокот, при што беше потенцирано дека процесот треба да се темели исклучиво на системот на заслуги и постигнувања.
Мислам дека е исклучително важно да напоменам дека јас претставувам земја кандидат која е 100 проценти усогласена со заедничката надворешна и безбедносна политика и сметам дека одлуките што ги носиме се заеднички, како што се заеднички и предизвиците со кои се соочуваме, истакна Муцунски.
Пораката што ја испраќаме до Брисел и до земјите членки е дека е неопходно да се најде опиплив пат за Западен Балкан да оди напред и начин да се затвори јазот помеѓу обврските, многуте прозорци на можност што ни беа ветени во минатото, фраза што често се употребува, сега е можноста, сега е моментумот, но испораката од Европската Унија секогаш недостигаше, рече Муцунски.
Продлабочувањето на соработката со цел унапредување на заедничките интереси и обезбедување континуирана поддршка за европската перспектива на земјата е од клучно значење, оценија Муцунски и Вајц.