Албанија ќе биде домаќин на следниот состанок на Европската политичка заедница

Албанија ќе биде домаќин на следниот состанок на Европската политичка заедница во првата половина на 2025 година.

Албанскиот премиер Еди Рама учествуваше на последниот состанок на Европската политичка заедница во Будимпешта, од каде го презеде и домаќинскиот стафет.

Рама го смета за привилегија фактот што следниот состанок на Европската политичка заедница ќе се одржи во Тирана.

„Морам да ви кажам дека до многу години наназад овој дијалог со ЕУ беше незамислив. Има низа причини и, секако, Владимир Путин е еден од нив бидејќи силно ја разбуди ЕУ, но морам да кажам дека на овој форум заедно со она што се случува и со Европската комисија, Новиот план за развој и постепеното интегрирање, сè е многу охрабрувачки“, рече Рама во изјава за медиумите по состанокот.

„Јас сум трагично оптимист за иднината, за иднината на Албанија, чијашто местоположба е без сомнение во Европа и ќе се бориме секој ден и ни е отворен веќе нов пат“, изјави Рама, се однесувајќи на фактот дека Албанија на 15 октомври ги отвори преговорите за првите поглавја со Европската унија.

Тирана и порано била домаќин на значајни настани на Европската унија. Така, на 6 декември 2022 година, Тирана за прв пат во историја беше домаќин на Самитот на Европската унија и Западниот Балкан, со присуство на сите лидери на ЕУ и оние од Западниот Балкан, кој истовремено за прв пат се одржа во една од државите на регионот.

На овој самит, лидерите на ЕУ ја истакнаа својата јасна поддршка за интеграцијата на Западниот Балкан во Европската унија. (8 ноември)