Амбасадорот на ЕУ, Сорека, го посети регионот Јабланица погоден од поплавите и свлекувањата на земјата, и најави помош од Европската унија

Јабланица (Фена) – Шефот на Делегацијата на Европската унија (ЕУ) и специјален претставник на ЕУ во Босна и Херцеговина, амбасадорот Луиџи Сорека ја посети областа на градот Јабланица каде потврди дека Европската унија ќе продолжи да и помага на БиХ во санирањето на последиците од поројните поплави, одроните и другите непогоди што ја погодија северна Херцеговина и Средна Босна.

Во делегацијата што ја посети областа на Јабланица, освен Сорека, беа и командантот на ЕУФОР генерал-мајор Ласло Штиц, амбасадорот на Хрватска во БиХ Иван Саболиќ и амбасадорот на Словенија во БиХ Дамијан Седар, кои ги обиколија погодените области и одржаа состанок со началникот на Јабланица Дамир Шабановиќ.

– Што се однесува до помошта, рано е да се говори за тоа. Помошта веќе пристигна, она што го имаме, го имаме од првиот момент кога видовме што се случи и каква беше катастрофата. Сите наши од соседството, општини и градови од БиХ, сите нивоа на власт, сите луѓе од соседните држави понудија помош. Сликата на Јабланица од претходно и сликата од денеска е тотално различна. Разговаравме и за механизмот за координација, членовите рекоа дека се тука за нас денеска, дека ќе бидат тука и утре и се додека состојбата не се врати во некое ниво на нормалното – изјави началникот на Јабланица Дамир Шабановиќ.

Шефот на делегацијата на ЕУ и специјален претставник на ЕУ во БиХ Луиџи Сорека нагласи дека граѓаните на Јабланица и пошироката област во овој момент на трагедијата не се сами.

– Градоначалникот ни објасни дека спасувањето и потрагата се уште се најитно прашање, важно е да спасителните тимови од тука, Хрватска, Словенија, Црна Гора и Србија се уште активно бараат луѓе и се обидат да спасат животи и тоа моментално е приоритет – порача Сорека.

Истакна дека од сабота навечер, кога БиХ го активирала механизмот за помош (Цивилна заштита на ЕУ), тимовите веднаш пристигнаа да помогнат.

– Тоа само по себе испраќа порака дека кога сме заедно, тогаш сме посилни, избегнуваме „дуплирање“ и ги користиме средствата каде што ни требат. Тој е суштината на Цивилната заштита на ЕУ – смета Сорека.

Вети и понатамошна помош од Европската унија во оваа тешка ситуација.

– Уште еднаш, ЕУ ќе биде со заедницата, на долг рок ќе покажеме солидарност, кога ќе се процени штетата ќе бидеме во можност да активираме останатите ресурси за да бидеме сигурни дека БиХ ќе има корист од ова. Секогаш велиме дека БиХ е во срцето на Европа, а денес можеме да видиме дека Европа дојде во срцето на Босна и Херцеговина за да помогне работите што побрзо да се подобрат – заклучи Сорека.

По барањето за помош од страна на Босна и Херцеговина на 5 октомври, Европската унија испрати тимови за потрага и спасување и достави итни резерви за да го поддржи првиот одговор на поплавите и одроните.

Вкупно дванаесет земји понудија помош на Босна и Херцеговина преку Механизмот за цивилна заштита на ЕУ.

Тимови за потрага и спасување од Хрватска, Словенија, Црна Гора и Србија веќе беа распоредени за време на викендот. Тие барале исчезнати лица и отстранувале урнатини за да помогнат во обнова на виталната инфраструктура.

Покрај тоа, ЕУ мобилизира итни резерви, како предмети за засолништа, од Албанија, Унгарија, Црна Гора, Романија и Турција. (9.10.2024.)