Have the article read by OpenAI (Beta). Please note that AI translations may take some time to process.Атина – Верувам дека Северна Македонија ќе сфати дека не е во нејзин интерес да инсистира на ставот што создава проблеми со нејзиниот најголем сосед Грција, која исто така е и голем инвеститор во земјата и од кого очекува поддршка на европски пат, рече грчкиот премиер Кирјакос Мицотакис во интервју за телевизијата „Антена“, говорејќи за односите меѓу Скопје и Атина и уште еднаш ја повтори позицијата дека очекува јасен став од македонскиот државен и политички врв дека го почитува Договорот од Преспа.
Мицотакис рече дека на Балканот, „за жал, сè уште постојат сили кои сметаат дека ќе имаат политичка корист ако ги разбудат старите духови на балканскиот национализам“, додавајќи дека ова „во голема мера се случи со актуелната Влада на Северна Македонија, и во предизборниот период, но до одреден степен и по изборите“.
Тој ги повтори позициите за Договорот од Преспа што ги имаше пред Нова демократија да дојде на власт и уште еднаш посочи дека „името на државата е Северна Македонија, тоа не се оспорува, без разлика дали се претставува во странство или името се користи за внатрешна употреба“.
– Северна Македонија не може да избега од ова. Гледам во последните два месеци дека Владата до одреден степен го сфати тоа. Она што го очекувам, не само јас, бидејќи прашањето не е билатерално, туку се однесува и на Европа, а до одреден степен се однесува и на НАТО, е многу јасна изјава на државниот и политичкиот врв дека почитувањето на Договорот од Преспа е целосно и дека името на земјата е Северна Македонија, без разлика дали го користат вон земјата или во внатрешноста на земјата. Верувам дека се движиме во вистинската насока, рече Мицотакис, нагласувајќи дека Грција веќе ги информорала „сојузниците за ставот на Северна Македонија“. (1 декември)
MIA е одговорна за уредувањето за оваа публикација.