Писонеро: ЕК анализира реформски агенди на Србија и другите партнери од ЗБ

БРИСЕЛ – Портпаролката на Европската комисија за соседство и проширување Ана Писонеро изјави дека Европската комисија во моментов ја анализира реформската агенда предвидена во Планот за раст за Западен Балкан, кој го поднесоа партнерите од Западен Балкан, вклучувајќи ја и Србија, и наведе дека овие реформски агенди ќе треба да содржат објаснување за мерките кои ќе придонесат за усогласување со надворешната и безбедносната политика на ЕУ. „Комисијата во моментов ги анализира реформските агенди кои ги поднесоа партнерите од Западен Балкан, Србија и другите партнери од Западен Балкан“, рече Писонеро на брифингот за новинарите во Брисел. Таа потсети дека усвојувањето на реформските агенди ќе се врши преку одлука за спроведување на Комисијата и дека, како што наведе, Комисијата пред тоа ќе се консултира со земјите членки. „Проценката е во тек“, наведе Писонеро. Таа објасни дека добивањето финансиска поддршка во рамките на овој инструмент ќе зависи од успешното спроведување на реформите, кои ќе мора да бидат договорени со Комисијата, а кои ќе ги покриваат како реформите во социјално-економската област, така и оние кои се однесуваат на основите на ЕУ. Писонеро вака одговори на прашањето на новинарите дали односите на некои земји од Западен Балкан со Русија ќе влијаат на првите исплати од Планот за раст за Западен Балкан, наведувајќи дека постојат повеќе услови и предуслови. Кога се зборува за усогласување со заедничката надворешна и безбедносна политика (ЗСБП) на ЕУ, како што додаде, тоа е вклучено како посебна цел во контекст на реформските агенди. „Тоа значи дека во реформските агенди земјите ќе треба да дадат објаснување како овие мерки, мерките кои планираат да ги преземат во рамките на своите реформски агенди, очекуваат дека ќе придонесат за постепено и континуирано усогласување, кога станува збор за заедничката надворешна и безбедносна политика на ЕУ, кое вклучува рестриктивни мерки“, рече Писонеро. Во врска со односите на Србија со Русија, таа ја посочи изјавата на портпаролот на Европската комисија Петер Стано, кој на брифингот, на прашањето да ја коментира средбата на потпретседателот на Владата на Србија Александар Вулин со рускиот претседател Владимир Путин, рече дека ЕУ очекува од Србија да се воздржи од интензивирање на односите и контактите со Русија. Тој додаде дека ЕУ очекува сите членови на Владата на Србија да ги почитуваат обврските кои Србија доброволно ги презеде кога станува збор за пристапувањето во ЕУ, што вклучува усогласување со надворешно политичките одлуки и акции на ЕУ. (5 септември)