Фурлас: Србија важна за Европа, целта е да придонесеме кон напредокот на Србија на патот кон ЕУ

БРИСЕЛ – Пратеник на Европскиот парламент (ЕП) од Кипар Лукас Фурлас, кој е избран за нов претседавач на делегацијата на ЕП за односите со Србија, рече дека Србија е важна земја за Европа и порача дека неговата цел ќе биде да се искористат средствата на располагање за да Србија значително напредува на патот кон ЕУ.

“Се наоѓаме во значаен момент за политиката на проширување и за Западниот Балкан. Посебно Србија е важна земја за Европа со значителни можности, но и големи предизвици и ние ќе бидеме тука да се соочиме со предизвиците. Мојата цел ќе биде да ги искористиме средствата што ги поседуваме заедно со нашите пријатели во парламентот на Србија за да придонесеме Србија да направи значаен напредок на својот европски пат”, рече Фурлас новинарите во Брисел.

Тој изрази и благодарност на колегите во ЕП за покажаната доверба. Фурлас денес е избран за нов претседавач на делегацијата на ЕП за односите со Србија, односно Парламентарниот одбор за стабилизација и придружување ЕУ-Србија. Тој е член на политичката групација на Европската народна партија во ЕП и партијата од десниот центар Демократско собирање од Кипар, а пратеник во ЕП е од 2019 година. Во ЕП е член на Одборот за надворешни работи (AFET), и е дел од делегацијата на ЕП во Заедничкиот парламентарен одбор ЕУ-Турција. Поранешниот новинар и политичар од Кипар ќе го наследи на позицијата претседавач на делегацијата на ЕП за односите со Србија италијанката пратеничка од групацијата на социјалистите и демократите во ЕП и членка на италијанската Демократска партија Алесандра Морети, која е избрана за потпретседателка на делегацијата на ЕП за односите со Србија како единствен кандидат за таа функција.

За втор потпретседател на делегацијата на ЕП за односите со Србија е избран Јоргос Афтиас од грчката Нова демократија, исто така член на Европската народна партија во ЕП. Делегацијата на ЕП во Парламентарниот одбор за стабилизација и придружување ЕУ-Србија ќе има 15 членови. Меѓупарламентарните делегации одржуваат односи и разменуваат информации со пратениците во други земји, региони и организации со цел, како што е наведено во соопштението на ЕП, неговање на основните вредности на ЕУ: слобода, демократија, почитување на човековите права и основните слободи, како и владеење на правото. Парламентарниот одбор за стабилизација и придружување се заеднички тела на ЕУ и државите потписнички на Спогодбата за стабилизација и придружување. Парламентарниот одбор за стабилизација и придружување ЕУ-Србија, кој се состои од членови на Народното собрание и ЕП, е основан, како што е наведено на сајтот на Собранието на Србија, со цел разгледување на сите аспекти на односите меѓу Србија и ЕУ и сите важни политички и економски прашања во процесот на европските интеграции на Србија, особено во спроведувањето на Спогодбата за стабилизација и придружување. На крајот на секој состанок и расправа за прашањата со дневниот ред, се усвојува декларација и препораки кои се испраќаат до Советот за стабилизација и придружување, како и до институциите на Србија и ЕУ. (3 октомври)