Еврогрупата го поздравува напредокот на Бугарија кон воведување на еврото

БРИСЕЛ/СОФИЈА – Државите од еврозоната го поздравија напредокот на Бугарија кон воведување на заедничката валута. Ова се наведува во заклучоците на земјите од Европската група, прифатени во рамките на состанокот на Европскиот совет во Брисел. Очекуваме оценка на Европската комисија (ЕК) и на Европската централна банка (ЕЦБ), се додава во текстот.

Бугарија побара од ЕК и ЕЦБ во февруари изготвување на вонредни извештаи за подготвеноста на земјата за прифаќање на еврото. Во Брисел бугарскиот премиер Росен Желјазков изјави пред новинарите дека очекува извештаите да бидат готови во мај или јуни.

Се надевам дека напорите на бугарското општество во последните децении за почитување на фискалната дисциплина, за избалансирани буџети, ќе дадат очекуваниот резултат, истакна тој на состанок со претседателката на ЕЦБ Кристин Лагард и претседателот на Европската група Паскал Донахју.

Бугарија е една од ретките земји во ЕУ, кои безусловно ги исполнуваа сите номинални критериуми за конвергенција, вклучително и критериумот за ценова стабилност, со кој имавме проблеми во последните години, рече на конференција во Софија гувернерот на Бугарската народна банка (БНБ) Димитар Радев. Останува ни еден финален чекор. Убеден сум дека сме во состојба да го направиме достојно и со самодоверба, рече Радев. 

Напредокот на Бугарија за пристапување кон еврозоната беше забележан и од претседателката на Европската банка за обнова и развој (ЕБОР) Одил Рено-Басо. Во интервју за БТА таа изјави дека во земјата има силно разбирање за потребата буџетскиот дефицит да се одржува до 3 проценти. Економијата сè уште расте многу силно во позитивната територија во споредба со останатиот дел од ЕУ, посочи Рено-Басо и потсети на прогнозите на институцијата за стапка на раст на бугарската економија од 2,4 проценти во 2025 г. и 2,8 проценти во 2026 година. 

По траење од 22 часа заседание вчера бугарското Народно собрание го усвои државниот буџет за 2025 г., во кој е предвиден буџетски дефицит од 3 проценти од Бруто домашниот производ.

Во последните редовни извештаи од минатата година ЕК и ЕЦБ забележаа дека Бугарија тогаш не одговараше единствено на барањето за ценова стабилност. Статистичката служба на Европската унија (ЕУ) „Евростат“ претстави оваа недела податоци за февруари, според кои инфлацијата во Бугарија веќе одговара на барањето за ценова стабилност. (20-21.03.2025 г.)