Народната банка на Чешка ќе ја разгледа можноста за инвестиции во биткоини, шефицата на ЕЦБ Лагард е против

Прага/ Франкфурт – Чешка народна банка (ЧНБ) ќе изработи анализа на можните инвестиции во други класи на активи. На денешниот состанок за тоа одлучи банкарскиот совет. Гувернерот на ЧНБ Алеш Михл оваа недела зборуваше за можноста да се вклучи биткоин во девизните резерви на централната банка. Централната банка во денешното соопштение до медиумите нагласи дека нема да го промени поставувањето на девизните резерви до оценката на заклучоците од анализата. Претседателката на Европската централна банка (ЕЦБ) Кристин Лагардова во четвртокот на прес-конференција како одговор на зборовите на Михл изрази убедување дека ниедна членка на Европската унија нема да го вклучи биткоинот во своите резерви.

“Во рамките на стратегијата за управување со девизните резерви, централната банка во последните две години ја зајакнува диверзификацијата на своите инвестиции. На предлог на гувернерот Алеш Михл, ЧНБ ќе оцени дали од аспект на диверзификација и принос е соодветно девизните резерви да се прошират и со инвестиции во други класи на активи,” изјави централната банка. Терминот до кога ќе биде обработена анализата, ЧНБ не го објави. Михл во средата во интервју за весникот Financial Times изјави дека ќе предложи на банкарскиот совет план за инвестиции во биткоини. Ако биде одобрен, биткоините би можеле да имаат удел до пет отсто на вкупните резерви на банката, кои сега изнесуваат 140 милијарди евра (3,5 трилиони CZK).

Лагардова изјави пред новинарите дека резервите мора да бидат ликвидни и безбедни и не би требало да бидат оптоварени со сомнение за перење пари или други криминални активности. Според нејзините зборови, таа веќе разговарала со Михл за тоа. “Со мојот колега од Чешка разговарав и го оставам на него да прави изјави по своја волја,” изјави раководителката на Европската централна банка. “Сигурна сум дека и тој, како и сите ние, е убеден за потребата да имаме ликвидни и безбедни резерви,” додаде. Директорот на Одделот за комуникации на ЧНБ Јакуб Холас потоа изјави за ЧТК дека банката нема да ги коментира изјавите на Лагардова.

И аналитичарите во реакција на предлогот на гувернерот на ЧНб укажуваа дека биткоинот е изразено ризично средство, што може да биде проблематично при неговото вклучување во резервите. Истовремено, според нив, ЧНБ може да се најде во одреден конфликт токму со Европската централна банка, која ја означува внатрешната вредност на биткоинот како нула. Меѓутоа, потегот на ЧНБ би можел да го насочи биткоинот повеќе кон редовните инвестициски средства. Задржаниот став кон можноста за вклучување биткоини во девизните резерви го има и министерот за финансии Збинек Станјура (ОДС). Тој изјави пред новинарите дека централната банка треба да биде симбол на стабилност и биткоинот не е стабилно средство. Тој, сепак, нагласи дека одлуката за овој потег ќе биде на банкарскиот совет на ЧНБ. (30 јануари)