Повеќето членки на ЕУ бараат финансирање од ЕИБ за одбранбената индустрија

БРУСЕЛ – Деветнаесет членки на ЕУ, вклучувајќи ја и Хрватска, побараа од Европската инвестициска банка (ЕИБ) да го зголеми кредитирањето за проекти во областа на безбедноста и одбраната.

„Во светлината на сегашните безбедносни предизвици со кои се соочува Европа, вклучувајќи ја и руската агресивна војна против Украина, клучно е да преземеме решителни чекори за зајакнување на одбранбената подготвеност и способност на Европа и на нејзината одбранбена индустриска база“, се вели во заедничкото писмо до претседателот на Европскиот совет Антонио Коста, полскиот премиер Доналд Туск и претседателката на ЕИБ Надија Калвино.

Писмото го потпишаа Белгија, Финска, Кипар, Чешка, Данска, Естонија, Франција, Грција, Хрватска, Италија, Латвија, Литванија, Луксембург, Холандија, Германија, Романија, Словачка, Шпанија и Шведска.

Потписниците бараат да се ревидира списокот на активности за кои ЕИБ нема мандат за финансирање и да се разгледа можноста за издавање на заеднички обврзници за одбрана.

Таа финансиска институција на ЕУ според сегашните правила не може да финансира производство на муниција, оружје и воена опрема и за тоа да се промени потребна е поддршка од мнозинството на земјите членки.

ЕИБ може да финансира производи со двојна намена кои се користат во цивилни и воени цели, како сателити, дронови и радарски системи.

„Темелно променетото безбедносно опкружување, кое на различни начини влијае на сите земји членки, бара зајакнување на технолошката и одбранбената база на ЕУ. Тука е исто така потребна посилна улога на ЕИБ за да ги решиме итните потреби за инвестиции“, се вели во писмото.(31 јануари 2025)