Порака од ЕУ до Зеленски: Не сте сам

БРИСЕЛ – Претседателката на Европската комисија Урсула фон дер Лајен и претседателот на Европскиот совет му порачаа на украинскиот претседател Володимир Зеленски во петокот дека не е сам, да остане силен и неустрашив, по скандалозниот третман кој му беше приреден во Овалната канцеларија во Белата куќа.

„Вашето достоинство им оддава почит на храброста на украинскиот народ. Бидете силни, храбри, неустрашиви. Не сте сами, драги претседателе Зеленски“, порачаа фон дер Лајен и Коста во заедничка порака на социјалните мрежи.

„Ќе продолжиме да работиме со вас за праведен и траен мир“, додадоа тие.

Претседателот на Европскиот совет Антонио Коста разговараше со Зеленски откако ја напушти Белата куќа и му ја изрази поддршката на Европската унија.

Украинскиот претседател Володимир Зеленски ја напушти во петокот Белата куќа по вербален конфликт со американскиот претседател Доналд Трамп, кој го обвини дека е неблагодарен и дека нема почит кон САД.

Зеленски ја напушти Белата куќа порано од планираното по невидено жестоката расправија во Овалната канцеларија кога Трамп рече да склучи мир со Русија инаку САД ќе престанат да му помагаат.

„Играјќи се со животите на милиони луѓе, играјќи се со трета светска војна“, му рече Трамп со лутина.

По состанокот, Трамп преку својата социјална мрежа порача дека „може да се врати кога ќе биде подготвен за мир“.

Трамп и Зеленски го завршија состанокот во Вашингтон по расправијата, а ја откажаа и првоначално планираната прес-конференција.

Белата куќа потврди дека е откажано потпишувањето на договорот меѓу Трамп и Зеленски за искористување на природните ресурси на Украина во замена за продолжување на поддршката на САД.

По жестоката расправија во Овалната канцеларија, украинската делегација се повлече на консултации во една просторија во Белата куќа, а според извештаите на американските медиуми, таму дојдоа државниот секретар Марко Рубио и советникот за национална безбедност Мајк Волц, кои им ја пренесоа на Украинците пораката на Трамп да ја напуштат Белата куќа. (28 февруари 2025)