Почна да важи првиот пропис за регулирање на вештачката интелигенција

Прага – Од 1 август важи во Чешка и во цела Европска унија првиот правен пропис кој ја регулира вештачката интелигенција (AI), познат и како AI Act. Тој го забранува, на пример, биометриското категоризирање на граѓаните и AI, која манипулира со луѓето, злоупотребува деца или ги класифицира луѓето според нивното социјално однесување. Регулативата исто така ќе го поедностави развојот, работењето и слободното движење на AI услугите и производите на внатрешниот пазар на ЕУ. Ова го соопшти кабинетот на заменикот премиер за дигитализација Иван Бартош (Пирати) во соопштението за печат.

“Чешка за време на своето претседателство значајно придонесе за создавањето на AI Act, кој е нашиот одговор на предизвиците на брзиот технолошки прогрес. Ние сакаме да осигуриме етичко и транспарентно користење на вештачката интелигенција, да ги заштитиме основните права на граѓаните и да им овозможиме на нашите компании да станат лидери во секторот. Ние сме првите кои се занимаваат со ова прашање на сеопфатен начин и со овој чекор поставуваме глобален стандард за безбедна и одговорна вештачка интелигенција. Граѓаните ќе бидат заштитени и ќе имаат сигурност дека вештачката интелигенција работи во нивна корист,“ изјави Бартош.

Намерата на регулативата според Бартош е покрај заштитата на населението, да се поддржат и иновациите. AI Act подразбира создавање на т.н. сандбокс, контролирана околина, во која ќе биде можно да се тестираат системите на вештачка интелигенција во реални услови пред да бидат пуштени на пазарот. Заедничкиот сандбокс може да го создадат и неколку земји-членки на ЕУ. Мерките ќе им помогнат на претприемачите да ги намалат почетните трошоци и да ја зголемат нивната конкурентност во меѓународна конкуренција.

Дел од тоа е и пакетот за иновации во AI, чија цел е да ги поддржи малите и средни претпријатија и стартапите во развојот на вештачката интелигенција. Европските стартапи ќе можат, на пример, да користат суперкомпјутери за тренинг на модели на одговорна вештачка интелигенција. AI Act не е според Бартош регулација во традиционална смисла, туку се фокусира на заштита на луѓето од злоупотреба на вештачката интелигенција и високо ризични AI системи. Колку е поголем ризикот што го претставува дадениот AI систем, толку построги правила за негово користење мора да се почитуваат. (1 август)